Төрийн аудитын байгууллага Монгол Улсын Их Хурлын 2024 оны ээлжит сонгуульд оролцох нам, эвслийн мөрийн хөтөлбөрт дүгнэлт гаргах ажлын хэсгийг байгуулан ажиллаж байна.
Тус аудитын бэлтгэл ажлын хүрээнд УИХ-ын 2024 оны ээлжит сонгуульд оролцох нам, эвслийн төлөөллийг урьж сонгуулийн мөрийн хөтөлбөрт дүгнэлт гаргахад анхаарах асуудлаар “Харилцан ойлголцох уулзалт”-ыг 2024 оны 03 дугаар сарын 14-ний өдөр Үндэсний аудитын газарт зохион байгууллаа. “Харилцан ойлголцох уулзалт”-д улс төрийн 17 намын төлөөлөл хүрэлцэн ирж, мөрийн хөтөлбөр боловсруулахад анхаарах асуудлаар ярилцлаа.
Төрийн аудитын байгууллагын Монгол Улсын Их Хурлын сонгуулийн тухай хуулийн дагуу сонгуулийн мөрийн хөтөлбөрт дүгнэлт ажлын хэсгээс хуулиар хүлээсэн үүрэг, хариуцлагын талаар, мөрийн хөтөлбөр нь хууль ёсны зохих шаардлагатай нийцсэн байх зэрэг холбогдох мэдээллийг албан захидлаар улс төрийн намуудад 2024 оны 02 дугаар сарын 27-29-ний өдрүүдэд шуудангаар болон биечлэн хүргүүлсэн юм.
Төрийн аудитын байгууллага УИХ-ын 2024 оны ээлжит сонгуульд оролцох нам, эвслийн мөрийн хөтөлбөрийг 2024 оны 03 дугаар сарын 22-ны Баасан, 23-ны Бямба, 24-ний Ням гарагуудад Үндэсний аудитын газарт хүлээн авна.
Хэрэв хуулийн шаардлага хангаагүй дүгнэлт гарах тохиолдолд 2024 оны 04 дүгээр сарын 10-ны өдрийн дотор тухайн нам, эвсэлд мэдэгдэх ба нам, эвслүүд алдаа зөрчлийг зассан мөрийн хөтөлбөрөө 2024 оны 04 дүгээр сарын 12-17-ны өдрүүдэд Үндэсний аудитын газарт хүрүүлнэ. Үндэсний аудитын газар 2024 оны 04 дүгээр сарын 26-ны өдөр нам, эвслүүдийн мөрийн хөтөлбөрт гаргасан аудитын дүгнэлтийг нэгтгэн Сонгуулийн ерөнхий хороонд хүргүүлнэ.
