Монгол Улсын Их Хурлын 2024 оны сонгуулийг ажиглаж, гарсан үр дүнгээ танилцуулахаар хүрэлцэн ирсэн Европын аюулгүй байдал хамтын ажиллагааны байгууллагын Ардчилсан институт, хүний эрхийн албаны Сонгуулийн асуудал хариуцсан ахлах зөвлөх Ксения Дашуцина, зөвлөх Горан Петров нар Үндэсний аудитын газрын удирдлагуудтай уулзалт хийлээ. ЕАБХАБ-ын Ардчилсан институт, хүний эрхийн албаны Сонгуулийн асуудал хариуцсан зөвлөх Горан Петров, Энэ удаа Монгол Улсад ажиллахдаа сонгуулийн ажиглалтын тайлан, зөвлөмжийг төрийн холбогдох байгууллагын удирдлагад танилцуулж байгаа юм. Улсын Их Хурал, Үндэсний аудитын газар, Сонгуулийн ерөнхий хороо болон бусад байгууллага санал, зөвлөмжийг таатай хүлээн авсныг тэрбээр уулзалтын үеэр тодотгосон. Үндэсний аудитын газар нь АИХЭА-ны Сонгууль ажиглах багаас гаргасан тайлан, зөвлөмжийг ажил хэрэг болгоход анхаарч ажиллахын сацуу энэ хүрээнд үргэлжлүүлэн идэвхтэй хамтран ажиллана гэдгийг илэрхийллээ. Тус алба нь хамгийн анх 2013 оны Ерөнхийлөгчийн сонгуулийг ажиглахаар Сонгууль ажиглах багаа Монгол Улс руу илгээж байсан юм.
