Улсын Их Хурлын Төсвийн байнгын хорооны хуралдаанаар Монгол Улсын 2025 оны төсвийн тухай хуульд өөрчлөлт оруулах тухай хуулийн хоёр дахь хэлэлцүүлгийг хийлээ. Хэлэлцүүлэгтэй холбоотойгоор уг хуулийн төсөлд өгсөн аудитын дүгнэлтийг Монгол Улсын Ерөнхий аудитор С.Магнайсүрэн танилцуулав. Уг дүгнэлтэд Засгийн газраас өргөн мэдүүлсэн Монгол Улсын 2025 оны төсвийн тухай хуульд өөрчлөлт оруулах тухай хуулийн төсөлд тус Байнгын хороонд хамаарах төсвийн гурван ерөнхийлөн захирагчийн төсөвт төвлөрүүлэх орлогыг нийт 2.9 тэрбум төгрөгөөр, зарлагыг 356.3 тэрбум төгрөгөөр тус тус бууруулахаар төлөвлөснийг дурдлаа.

Байнгын хороо энэхүү төслийг хэлэлцэн шийдвэрлэхдээ төсвийн ерөнхий захирагчид өөрийн хариуцсан салбартаа чиг үүргийн шинжилгээ, ажлын байрны болон бүтээмжийн үнэлгээг хийсний үндсэн дээр ажлын ачааллыг оновчтой хуваарилах зорилгоор харьяа байгууллагуудын орон тоонд зохицуулалт хийх боломж олгох асуудлыг судалж үзэхэд анхаарал хандуулахыг зөвлөв.Мөн сул орон тооноос бусад цомхотголд орж буй албан хаагчдад Төрийн албаны тухай хуулийн 62.1.4-т заасны дагуу ажлаас чөлөөлөгдсөний нэг удаагийн тэтгэмжийн зардал шаардагдана. Тиймээс энэ хуулийн төслийн хэлэлцүүлгийн явцад гарц шийдлийг олоход анхаарал хандуулахыг мөн дүгнэлтэд дурджээ. Дээрх саналуудаас гадна төсөвт тодотгол хийх нөхцөл үүссэн тохиолдолд төрийн аудитын байгууллагаас аудитын үйл ажиллагааны үе шатны стандартын дагуу хянаж, дүгнэлт гаргахад цаг хугацааны хувьд хязгаарлагдмал байх тохиолдол байнга гарч байгааг анхааралдаа авахыг санууллаа. Үүнтэй холбогдуулан аудитын дүгнэлт гарган Улсын Их Хуралд хүргүүлэх зохистой хугацааг Төсвийн тухай хуульд тусгаж өгөх шаардлагатайг Монгол Улсын Ерөнхий аудитор онцлов.