Хөдөө аж ахуйн салбараас бусад салбарт хэрэгжүүлсэн гадаадын зээл, тусламжийн хөрөнгийн зарцуулалт, гүйцэтгэлийн үр дүн, үр нөлөөнд хийх гүйцэтгэлийн аудитыг өнөөдөр Үндэсний аудитын газар эхлүүллээ. Тус аудитаар Засгийн газрын гадаад зээл, тусламжийн хөрөнгийн санхүүжилтээр хэрэгжүүлсэн, хэрэгжиж буй төсөл, арга хэмжээ нь хөгжлийн зорилтод нийцсэн, үр өгөөжтэй эсэхийг үнэлж дүгнэх юм. Аудит нь Монгол Улсын Сангийн яаманд төвлөрөх бөгөөд Засгийн газрын гадаад зээл, тусламжийн санхүүжилтээр 2021-2025 онд хэрэгжиж буй төсөл, арга хэмжээг хэрэгжүүлэгч төрийн захиргааны төв болон холбогдох байгууллагуудыг хамруулна. Үүнд Засгийн газрын ХЭГ болон АҮЭБЯ, БОУАӨЯ, БХЯ, БЯ, ГБХНХЯ, ЗТЯ, ЭЗХЯ, СЯ, ССАЖЗЯ, ХББОСЯ, ХЗДХЯ, ХХААХҮЯ, ЦЦИХХЯ, ЭМЯ, ЭХЯ-ны зорилтот төсөл, арга хэмжээний гүйцэтгэл, явц, үр дүнтэй холбогдох тайлан, мэдээлэл багтах юм. Үндэсний аудитын газрын Гүйцэтгэлийн аудитын газрын захирал, тэргүүлэх аудитор Д.Энхболд аудитыг нээж, төлөвлөгөө хөтөлбөрийг танилцуулав. Аудитын тайланг Монгол Улсын Их Хурлын Эдийн засгийн байнгын хороо, Аж үйлдвэржилтийн бодлогын байнгын хороо, Засгийн газар болон холбогдох байгууллага, албан тушаалтанд танилцуулна.
