Бүгд Найрамдах Киргиз Улсын Тооцооны танхимын дарга Алмазбек Акматов тэргүүтэй төлөөлөгчид Монгол Улсад ажлын айлчлал хийж байна.Айлчлалын хүрээнд өнөөдөр Монгол Улсын Ерөнхий аудитор С.Магнайсүрэн, БНКУ-ын Тооцооны танхимын дарга тэргүүтэй төлөөлөгчид, Азийн хөгжлийн банкны Суурин төлөөлөгчийн гурван талт уулзалт боллоо. Ерөнхий аудитор С.Магнайсүрэн Монгол, Киргиз хоёр улс нь газар зүйн байршил, ард түмний түүх, соёлын уламжлалт ойр харилцааг онцлоод, БНКУ-ын Тооцооны танхимын дарга тэргүүтэй төлөөлөгчдийн айлчлалд амжилт хүслээ. Мөн тэрбээр Олон улсын аудитын дээд байгууллага /ИНТОСАИ /-аас хиймэл оюун ухаан, технологийн дэвшлийг аудитад ашиглах чиглэлийг гишүүн орнуудын аудитын дээд байгууллагад уриалж, арга зүйн дэмжлэг үзүүлж байгаа. Энэ нь манай байгууллагуудын тэргүүлэх зорилт хийгээд сорилт болж байгаа. Монгол Улсын Төрийн аудитын байгууллага дижитал шилжилтээр тодорхой бодлого хэрэгжүүлж байгаа бөгөөд БНКУ-ын Тооцооны танхимтай арга зүй, туршлагаа хуваалцаж, үр дүнтэй хамтран ажиллана гэдэгт эргэлзэхгүй байгаагаа илэрхийлэв. Мөн ҮАГ болон Азийн хөгжлийн банкны хамтын ажиллагааны хүрээнд хэрэгжүүлж буй төсөл хөтөлбөрүүд амжилттай хэрэгжиж байгааг тэмдэглэлээ.

Ноён Алмазбек Акматов “БНКУ-ын Тооцооны танхим нь олон улсын сайн туршлагыг нутагшуулахыг тэргүүлэх чиглэлээ болгосон. Мөн манай байгууллагын тогтвортой үйл ажиллагаа, хөгжлийн стратегийн түлхүүр нь технологийн хөгжил хэмээн харж байгаа. Тиймээс бүс нутагтаа цахим шилжилтээр хурдтай өөрчлөлт хийж байгаа Монгол Улсын Төрийн аудитын байгууллагатай үр дүнтэй хамтран ажиллах нь цаашдын хөгжлийн шинэ суурийг авчирна гэдэгт эргэлзэхгүй байна” гэсэн юм. Мөн Азийн хөгжлийн банкны дэмжлэг нь талуудад туршлага солилцох, чадавх бэхжүүлэх боломжийг нэмэгдүүлж байгааг онцоллоо.