Монгол Улсын Их Хурлын Байгаль орчин, хүнс, хөдөө аж ахуйн байнгын хорооны дарга, Улсын Их Хурал дахь Монгол-Киргизийн парламентын бүлгийн дарга Б.Бейсен манай оронд ажлын айлчлал хийж буй БНКУ-ын Тооцооны танхимын дарга Алмазбек Акматовыг өнөөдөр хүлээн авч уулзлаа.
Уулзалтын эхэнд Монгол Улсын Үндсэн хуульд оруулсан нэмэлт, өөрчлөлтийн хүрээнд төрийн аудитын байгууллага хараат бусаар үйл ажиллагаа явуулах, бие даасан байдлыг хангахад чухал ач холбогдолтой эрх зүйн орчин бүрдснийг Байнгын хорооны дарга Б.Бейсен онцолсон юм. Улмаар хоёр орны аудитын дээд байгууллагын хамтын ажиллагааг үр дүнтэй байлгахад Улсын Их Хурал дахь Монгол-Киргизийн парламентын бүлгийн даргын зүгээс дэмжин ажиллахаа илэрхийлсэн юм. 
Байнгын хорооны дарга Б.Бейсен нь 2 удаа Монгол-Киргизийн парламентын бүлгийн даргаар ажиллаж байгаа бөгөөд, хоёр орны парламентын харилцаа, хамтын ажиллагаа өргөжин тэлж буйд сэтгэл хангалуун байдаг гэсэн юм. БНКУ-ын Тооцооны танхимын дарга Алмазбек Акматов тус улсын парламент болон аудитын дээд байгууллагын удирдлага, үйл ажиллагааны зарчмын талаар товч танилцуулсан. Уулзалтад Монгол Улсын Ерөнхий аудитор С.Магнайсүрэн болон албаны бусад төлөөлөл байлцлаа. 
