БНСУ-ын Аудит, хяналтын сургалтын хүрээлэнгийн Ерөнхийлөгч Ким Соон Сик тэргүүтэй төлөөлөгчдийг Монгол Улсын Ерөнхий аудитор С.Магнайсүрэн өнөөдөр /2025.11.20/ хүлээн авч уулзлаа. Уулзалтын эхэнд Монгол Улсын Ерөнхий аудитор С.Магнайсүрэн өмнө нь БНСУ-д ажилласан талаараа дурдаад, тус хүрээлэнгийн сайн туршлага, технологийн дэвшлийг аудитад ашиглах арга зүй, чиг хандлагаас суралцах хүсэлтэйгээ илэрхийлэв.
БНСУ-ын Аудит, хяналтын сургалтын хүрээлэн нь 1995 онд байгуулагдсан бөгөөд аудиторууд, төрийн байгууллага, орон нутгийн засаг захиргааны аудитор, нягтлан бодогчдыг чадавхжуулах сургалтыг тасралтгүй зохион байгуулдаг байна. Мэдээлэл, технологийн хурдацтай өсөлт, корона вируст цар тахлаас үүдэн тус хүрээлэн нь онлайн сургалтын системийг хөгжүүлэн, зөвхөн БНСУ төдийгүй бусад орны ижил чиг үүргийн байгууллагын албан хаагчдыг чадавхжуулах хөтөлбөрийг хэрэгжүүлэх болсон. Монгол Улсын Төрийн аудитын байгууллагатай өрнүүлдэг хамтын ажиллагаагаа өргөжүүлэн хөгжүүлэх, шинэ санал санаачилгыг дэмжихээ тус хүрээлэнгийн Ерөнхийлөгч Ким Соон Сик илэрхийллээ. 
Албан уулзалтын хүрээнд Монгол, Солонгосын аудитын дээд байгууллагууд бодлого, үйл ажиллагаа, мэдээлэл технологийн төвийн үйл ажиллагаа, сургалт хөгжлийн талаар танилцуулга хийж, харилцан туршлагаа хуваалцав.
