Монгол Улсын Ерөнхий аудитор С.Магнайсүрэн өнөөдөр /2025.12.17/ Бүгд Найрамдах Турк Улсын Тооцооны шүүхийн Ерөнхий захирал Ариф Зинжержи, Тэргүүлэх аудитор Адем Гүлсевер, Туркийн хамтын ажиллагаа, зохицуулалтын агентлаг (ТИКА)-ийн Улаанбаатар дахь хөтөлбөрийн зохицуулагч Мустафа Бүтүн, БНТУ-аас Монгол Улсад суугаа Элчин сайдын яамны III нарийн бичгийн дарга болон бусад төлөөлөгчдийг хүлээн авч уулзлаа.
Уулзалтын эхэнд Монгол Улсын Ерөнхий аудитор С.Магнайсүрэн ноён Ариф Зинжержигийн Төрийн аудитын байгууллагад хийж буй ажил хэргийн айлчлалд амжилт хүсээд, хоёр байгууллагын хамтын ажиллагааг идэвхжүүлэх талаар санал солилцов. БНТУ-ын Тооцооны шүүхийн Ерөнхий захирал Ариф Зинжержи найрсаг дотноор хүлээн авч уулзсанд талархал илэрхийлээд, Монгол Улсын Төрийн аудитын байгууллагатай хамтын ажиллагааны санамж бичгийг тохиромжтой аль ч хугацаанд байгуулахад бэлэн байгаагаа илэрхийлэв.
Монгол Улсын Үндэсний аудитын газар болон Бүгд Найрамдах Турк Улсын Тооцооны шүүх хооронд анх 2004 онд “Хамтран ажиллах тухай харилцан ойлголцлын санамж бичиг” байгуулж байсан. Дэлхий нийтийг хамарсан коронавируст цар тахлын улмаас зогсонги байдалд орсон хамтын ажиллагааг дахин идэвхжүүлэх хүсэлтийг Монгол Улсын Ерөнхий аудитораас БНТУ-ын Тооцооны шүүхийн Ерөнхийлөгч Метин Йенерт албан бичгээр хүргүүлсний дагуу ноён Ариф Зинжержи тэргүүтэй төлөөлөгчид Монгол Улсад ажил хэргийн айлчлал хийж байна.
