Төрийн аудитын байгууллагаас “Улсын төсвийн 2025 оны хөрөнгө оруулалтын төлөвлөгөөний хэрэгжилт, үр дүн”-д гүйцэтгэлийн аудит хийхтэй холбогдуулан тус сэдвийн хүрээнд иргэд, олон нийт, аж ахуйн нэгж, байгууллагуудаас санал, хүсэлт, бодит мэдээллийг нээлттэй хүлээн авч байна.
Монгол Улсын 2025 оны төсвийн тухай хуульд 29 төсвийн ерөнхийлөн захирагчийн төсвийн багцад өмнөх оноос үргэлжлэн хэрэгжих 505, тухайн оноос эхлэн хэрэгжих 106, нийт 8,735.5 тэрбум төгрөгийн төсөвт өртөгтэй 611 төсөл, арга хэмжээг 2,914.9 тэрбум төгрөгөөр санхүүжүүлэхээр баталсан.
Аудитын зорилго нь улсын төсвийн хөрөнгө оруулалтын төлөвлөлт, худалдан авах ажиллагаа, санхүүжилт, гүйцэтгэл, чанар, хэрэгжилт, үр дүнг үнэлэх, тулгамдаж буй асуудлыг тодорхойлж, сайжруулахад чиглэсэн дүгнэлт, зөвлөмж боловсруулахад чиглэх юм. Иргэд, олон нийт, аж ахуйн нэгж байгууллагууд улсын төсвийн хөрөнгө оруулалтаар хэрэгжсэн болон хэрэгжиж буй төсөл, арга хэмжээний санхүүжилт, чанар, хугацаа хэтрэлт, ашиглалтад орсны дараах бодит байдалтай холбоотой санал, мэдээллээ munkh-erdeneb@audit.gov.mn цахим шуудангийн хаяг болон Үндэсний аудитын газрын албан ёсны фэйсбүүк хуудсанд ирүүлэх боломжтой.
Аудитын төлөвлөлтийн өмнөх үе шатанд иргэд, олон нийтийн оролцоог хангах нь бодит нөхцөл байдлыг үнэн зөв тодорхойлоход чухал ач холбогдолтой бөгөөд ирүүлсэн мэдээллийн эх сурвалжийн нууцлалыг чандлан хадгалж, зөвхөн гүйцэтгэлийн аудитын зорилгоор ашиглах болно.
