“Монголбанкны бүтэц, зохион байгуулалт, чиг үүргийн хуваарилалт, Төрийн хэмнэлтийн тухай хуулийн хэрэгжилтийн үр нөлөөт байдал”-д хийх гүйцэтгэлийн аудитын нээлтийг өнөөдөр /2026.01.29/ хийлээ. Нээлтийг Үндэсний аудитын газрын Гүйцэтгэлийн аудитын газрын захирал, тэргүүлэх аудитор Д.Энхболд хийж, төлөвлөгөө, хөтөлбөрийг танилцуулан, аудитын явцад анхаарах шаардлагатай асуудлын талаарх мэдээллийг өглөө.
Аудитад Монголбанк, Мөнгөний бодлогын хороо, Хяналтын зөвлөл болон тус банкны үйл ажиллагаатай холбоотой бусад хамрагдагч нэгжүүдийг хамруулж авч үзэх юм. Улмаар Монголбанкны бүтэц, зохион байгуулалт, чиг үүрэг, хүний нөөц, Төрийн хэмнэлтийн тухай хуульд хамаарах үндсэн хөрөнгө, үйл ажиллагааны зардлын зарцуулалт, зээл олголт, мөнгөн тэмдэгт хэвлэлт, хяналтын үйл ажиллагааны баримт материалын хүрээнд аудитыг гүйцэтгэхээр төлөвлөөд байна. Аудитын тайланг 2026 оны 04 дүгээр сарын 20-ны өдрийн дотор Улсын Их Хурал, Монголбанк болон холбогдох байгууллага, албан тушаалтанд хүргүүлэх юм. 
