Үндэсний аудитын газрын удирдлагууд өнөөдөр Ардчиллын төлөөх Вестминстер сан (Westminster Foundation for Democracy)-ийн Сонгуулийн асуудал хариуцсан хараат бус зөвлөх Петр Вардлег хүлээн авч уулзлаа.
Уулзалтын үеэр төрөөс улс төрийн намуудад олгож буй санхүүжилтийн зарцуулалтад хийх аудитын талаар санал солилцож, улс төрийн намын санхүүгийн болон үйл ажиллагааны талаарх Их Британи, Умард Ирландын Нэгдсэн Хаант Улсын туршлагыг хуваалцсан юм. Ардчиллын төлөөх Вестминстер сан нь ИБУИНХУ-ын Лондон хотод төвтэй байгууллага бөгөөд парламентын ардчиллыг бэхжүүлэх, улс төрийн нам, сонгуулийн тогтолцооны ил тод, шударга байдлыг нэмэгдүүлэх, иргэдийн оролцоо, төлөөллийн чанарыг сайжруулах, мөн эмэгтэйчүүд, залуус, эмзэг бүлгийн улс төрийн оролцоог дэмжих зорилгоор үйл ажиллагаа явуулдаг байна.
Тус сангийн зөвлөх Петр Вардле ИБУИНХУ-аас Монгол Улсад суугаа Онц бөгөөд Бүрэн эрхт Элчин сайдын санаачилгаар энэ сарын 02–ноос 07-ны өдрүүдэд Монгол Улсад ажиллаж байна. Уулзалтад Үндэсний аудитын газрын Тамгын дарга, тэргүүлэх аудитор Б.Бундхорол, Санхүүгийн аудитын газрын захирал, тэргүүлэх аудитор Ц.Наранчимэг, Бодлого, төлөвлөлт, инновацын газрын дарга Х.Баярмаа нар болон албаны төлөөлөл оролцлоо. 
