Үндэсний аудитын газар “Арилжааны банкуудад төсөв, Засгийн газрын тусгай сан, төрийн болон орон нутгийн өмчит аж ахуйн нэгжүүдээс байршуулсан хөрөнгийн үр дүн” сэдэвт гүйцэтгэлийн аудитыг эхлүүлж, аудитын төлөвлөгөөг танилцуулах нээлтийг өнөөдөр хийлээ.

Үндэсний аудитын газрын Гүйцэтгэлийн аудитын газрын захирал, тэргүүлэх аудитор Д.Энхболд аудитын зорилго, хамрах хүрээ, анхаарах асуудлуудыг танилцуулсан юм.

Энэхүү аудитаар:

• Засгийн газрын тусгай сангуудын мөнгөн хөрөнгийн чөлөөт үлдэгдлийг санхүүгийн эрсдэл хамгийн бага байхаар удирдан зохион байгуулсан эсэх
• Төрийн болон орон нутгийн өмч, өмчийн оролцоотой хуулийн этгээдүүдийн арилжааны банканд байршуулсан хөрөнгө үр ашигтай, өгөөжтэй байсан эсэх
• Тусгай сан болон төрийн өмчит байгууллагуудын арилжааны банкин дахь данс, хадгаламжид тавих хяналт, үр дүнгийн тооцоолол хангалттай хийгдсэн эсэх зэрэгт дүгнэлт өгнө.

Аудитад Засгийн газрын 27 тусгай сан болон зарим төрийн болон орон нутгийн өмчит аж ахуйн нэгжүүдийн 2023–2025 оны хугацаанд нэр бүхий арилжааны банкуудад байршуулсан мөнгөн хөрөнгийг хамруулах юм. Мөн Засгийн газрын дотоод хяналтыг хэрэгжүүлэх чиг үүрэг бүхий Сангийн яам, Төрийн өмчийн бодлого зохицуулалтын газар, “Эрдэнэс Монгол” ХХК, төсвийн ерөнхий захирагчид, түүнчлэн арилжааны банкны үйл ажиллагаанд хяналт тавих Монголбанк болон бусад холбогдох байгууллагуудыг хамруулан авч үзэхээр төлөвлөжээ.

Аудитын нээлтэд Монголбанк, Засгийн газрын Хэрэг эрхлэх газар, салбарын яамд, Төрийн өмчийн бодлого зохицуулалтын газар, Эрүүл мэндийн даатгалын ерөнхий газар, Эрдэнэс Монгол” ХХК, “Эрдэнэт” ТӨҮГ, ШУТИС болон арилжааны банкуудын төлөөлөл оролцлоо.