Монгол Улсын Ерөнхий аудитор С.Магнайсүрэн өнөөдөр (2026.02.12) Дэлхийн банкны Зүүн Ази, Номхон далайн бүс нутгийг хариуцсан хэлтсийн Санхүүгийн удирдлагын тэргүүлэх мэргэжилтэн хатагтай Живанка Б.Викрамасингхэ-г хүлээн авч уулзлаа. Уулзалтын үеэр Ерөнхий аудитор С.Магнайсүрэн Төрийн аудитын байгууллагын стратеги, цаашдын зорилтыг танилцуулж, аудитын үйл ажиллагааг цахимжуулах, хиймэл оюун ухааныг нэвтрүүлэх, аудитын шийдвэрийн хэрэгжилтийг сайжруулах, албан хаагчдын чадавхыг бэхжүүлэхэд онцгойлон анхаарч буйгаа онцоллоо. Мөн эдгээр зорилтыг хэрэгжүүлэх нарийвчилсан төлөвлөгөөг боловсруулж, олон улсын донор байгууллагуудтай идэвхтэй хамтран ажиллаж байгааг тэмдэглэв. Хатагтай Живанка Б.В. Дэлхийн банкны зүгээс Төрийн аудитын байгууллагын чадавхыг бэхжүүлэх, тус банкнаас Монгол Улсад хэрэгжиж буй хөгжлийн төслүүдийн хэрэгжилтэд аудит хийлгэх нь чухал ач холбогдолтойг онцолсон юм. Иймд Үндэсний аудитын газрын чадавхыг сайжруулахад чиглэсэн боломж, шийдлийг эрэлхийлэхийн зэрэгцээ Дэлхийн банкнаас санхүүжүүлэн хэрэгжүүлж байгаа төслүүдийн үр нөлөөг нэмэгдүүлэхэд ТАБ-ын үүрэг оролцоог нэмэгдүүлэн ажиллахаа илэрхийллээ.
