Аймаг, нийслэл, сум, дүүргийн иргэдийн Төлөөлөгчдийн Хурлын 2026 оны нөхөн сонгууль зургаадугаар сарын 21-ний өдөр болно. “Аймаг, нийслэл, сум, дүүргийн иргэдийн Төлөөлөгчдийн Хурлын 2026 оны нөхөн сонгуулийн үйл ажиллагааг зохион байгуулах цаг хугацааны хуваарь”-т зааснаар сонгуульд оролцох нам, эвсэл 2026 оны 4 дүгээр сарын 15-аас, бие даан нэр дэвшигч 2026 оны 4 дүгээр сарын 28-аас өмнө мөрийн хөтөлбөр, Хандивын тайландаа дүгнэлт гаргуулахаар төрийн аудитын байгууллагын орон нутаг дахь салбар байгууллагад хүргүүлнэ. Төрийн аудитын байгууллага нам, эвслийн сонгуулийн мөрийн хөтөлбөр хуульд заасан шаардлагад нийцэж байгаа эсэх талаарх дүгнэлтийг 2026 оны 4 дүгээр сарын 22-ны өдрөөс өмнө тухайн шатны сонгуулийн хороонд хүргүүлнэ. Харин бие даан нэр дэвшигчийн мөрийн хөтөлбөр хуульд заасан шаардлага хангаж байгаа эсэх дүгнэлтийг 2026 оны 5 дугаар сарын 17-оос өмнө тухайн шатны сонгуулийн хороонд хүргүүлэхээр хуваарьт заасан.
2026 онд таван аймгийн есөн сумын 29 хэсэгт аймгийн иргэдийн Төлөөлөгчдийн Хурлын 9 мандатад нөхөн сонгууль, 15 аймгийн 33 сумын 44 хэсэгт сумын иргэдийн Төлөөлөгчдийн Хурлын 39 мандатад нөхөн сонгууль зохион байгуулна.
Аймаг, нийслэл, сум, дүүргийн иргэдийн Төлөөлөгчдийн Хурлын нөхөн сонгууль зохион байгуулах аймаг, сумдыг мэдээллийг хүргэж байна.
Эх сурвалж: Сонгуулийн ерөнхий хороо
