Монгол Улсын Их Хурлын Төсвийн байнгын хорооны өнөөдрийн (2026.04.28) хуралдаанаар Төрийн аудитын байгууллагын 2025 оны үйл ажиллагааны тайланг хэлэлцлээ.  

Танилцуулгыг Монгол Улсын Ерөнхий аудитор С.Магнайсүрэн хийв. Төрийн аудитын байгууллага нь 2025 онд хуулийн дагуу 18, бодлогоор 19, нийт 37 сэдвийн хүрээнд аудитыг гүйцэтгэж Монгол Улсын Их Хурал болон холбогдох Байнгын хороодод тус тус хүргүүлсэн. Тодруулбал, 37 сэдвийн хүрээнд 6974 шалгагдагч байгууллагыг хамруулан санхүүгийн тайлангийн 3677, гүйцэтгэлийн 94, нийцлийн 183, нийт 3954 аудитыг хийж гүйцэтгэлээ.

Аудитын дүнд 57.4 тэрбум төгрөгийн 3,014 төлбөрийн акт тогтоож, 14.4 их наяд төгрөгийн 7424 албан шаардлага, 5.4 их наяд төгрөгийн 11,998 зөвлөмж, 437.9 тэрбум төгрөгийн 296 сахилгын шийтгэл ногдуулах албан шаардлага өгсөн. Мөн 55.8 тэрбум төгрөгийн 51 асуудлыг хууль хяналтын байгууллагад шилжүүлээд байна. Аудитын үр дүнд 2025 онд улс, орон нутгийн төсөвт 62.8 тэрбум төгрөгийн орлогыг төвлөрүүлсэн юм.

Төрийн аудитын байгууллага нь эрсдэлд суурилсан, ач холбогдолтой, олон түмний хариулт нэхсэн, улс орны хөгжилд тулгамдаж буй нэн тэргүүний асуудлыг онилсон сэдэв бүхий аудитыг сонгон хийх, аудитын шийдвэрийн хэрэгжилтийг нэмэгдүүлэн, үр нөлөөг тооцох, төрийн санхүүгийн удирдлагыг сайжруулж, эдийн засгийн тогтвортой хөгжлийг хангахад дэмжлэг үзүүлэхэд анхааран ажиллаж буйг Ерөнхий аудитор С.Магнайсүрэн онцолсон юм.

              Төрийн аудитын байгууллага аудитын үр дүн, шийдвэрийн хэрэгжилт, нийгэмд бий болгох аудитын нөлөөллийг зорилгоор 2026 оныг “Аудитын нөлөөллийг тооцох, үнэлэх тогтолцоог төлөвшүүлэх” жил болгон ажиллаж байна.