БНХАУ-ын Үндэсний аудитын газрын төлөөлөгчдийн Монгол Улсад хийж буй ажлын айлчлалын хүрээнд “Хоёр талт хамтарсан туршлага солилцох сургалт, хэлэлцүүлэг”-ийг амжилттай зохион байгууллаа. Монгол Улсын Үндэсний аудитын газар болон Бүгд Найрамдах Хятад Ард Улсын Үндэсний аудитын газар хооронд байгуулсан харилцан ойлголцлын санамж бичгийн хүрээнд уламжлал болгон зохион байгуулдаг тус арга хэмжээ энэ онд Улаанбаатар хотноо болсон юм.
Энэ удаагийн сургалт, хэлэлцүүлэг нь БНХАУ-ын Үндэсний аудитын газрын туршлага, шинэчлэл, хөгжлийн чиг хандлагатай илүү өргөн хүрээнд танилцах боломж олголоо. Тухайлбал, хариуцлагыг нэмэгдүүлэх замаар засаглалыг бэхжүүлэх, байгаль орчны аудит, Аудитын дээд байгууллагын орон нутаг дахь нэгжүүдийг үр ашигтай удирдах нь зэрэг нэн чухал сэдвүүдийн хүрээн илтгэл танилцуулга сонсож, харилцан мэдлэгээ хуваалцлаа. Түүнчлэн БНХАУ-ын Үндэсний аудитын газрын хэрэгжүүлж буй их өгөгдөлд суурилсан аудит, бодит цагийн аудит, аудитын нэгдсэн мэдээллийн системийн талаар танилцаж, албан хаагчид асуулт тодруулан, санал солилцлоо. Энэхүү арга хэмжээ нь хоёр орны Аудитын дээд байгууллагын хамтын ажиллагааг өргөжүүлэх, харилцан туршлагаа хуваалцах, шинэ санаа, шилдэг инновацийг танилцуулсан ач холбогдолтой байв.
