Үндэсний аудитын газар болон Монгол Улсын Их Сургууль өнөөдөр (2026.07.08) хамтын ажиллагааны санамж бичиг байгууллаа. Санамж бичигт Монгол Улсын Ерөнхий аудитор С.Магнайсүрэн, МУИС-ийн ректор Б.Очирхуяг нар гарын үсэг зурсан бөгөөд талууд эрдэм шинжилгээ, судалгаа, сургалт болон хүний нөөцийн хөгжил зэрэг хамтын ажиллагааны үндсэн чиглэлүүдээр хамтран ажиллахаар тохиролцов.
Тухайлбал, эрдэм шинжилгээний ажлыг дэмжих, мэдлэг, туршлага солилцох сургалт, семинар, уулзалт, хэлэлцүүлгийг хамтран зохион байгуулах, олон улсын болон үндэсний хэмжээний хамтарсан судалгаа, шинжилгээ хийх, аудитын арга зүй болон шинэ технологи, инновацыг хөгжүүлэх чиглэлээр хамтран ажиллах юм.Мөн хүний нөөцийг бэлтгэх, чадавхжуулах зорилгоор мэдээллийн технологи, дата анализ, хиймэл оюун ухаан, хувь хүний хөгжлийн чиглэлээр зэргийн болон зэргийн бус сургалтуудыг хамтран зохион байгуулахаар тусгажээ. Түүнчлэн “Нээлттэй аудит” хөтөлбөрийн хүрээнд оюутан дадлагажуулах, эрдэмтэн судлаачид, мэргэжилтнүүдийн хамтын оролцоог нэмэгдүүлэх, мэдээлэл, өгөгдлийг хууль тогтоомжийн хүрээнд харилцан солилцож, хамтран ашиглах зэрэг чиглэлээр үр дүнтэй хамтран ажиллахаар төлөвлөж байна. Монгол Улсын Ерөнхий аудитор С.Магнайсүрэн санамж бичигт тусгагдсан хамтын ажиллагааны чиглэлүүд нь Төрийн аудитын байгууллагын тэргүүлэх зорилт, үйл ажиллагааны бодлого, төлөвлөлттэй бүрэн нийцэж байгааг онцолж, энэхүү хамтын ажиллагаанд өндөр ач холбогдол өгч буйгаа илэрхийллээ.
Харин МУИС-ийн ректор Б.Очирхуяг хоёр байгууллагын хамтын ажиллагаа зөвхөн талуудад төдийгүй Монгол Улсын нийгэм, эдийн засгийн хөгжил, хүний нөөцийн чадавхыг бэхжүүлэх, зарим салбарын хөгжил, төлөвшилд бодит хувь нэмэр оруулна гэдэгт итгэлтэй байна гэв.
