Монгол Улсын Ерөнхийлөгчийн зарлигаар “Монгол Улсын Гавьяат эдийн засагч” цолоор шагнагдсан ахмадуудаа Монгол Улсын Ерөнхий аудитор С.Магнайсүрэн хүлээн авч уулзан, хүндэтгэл үзүүллээ.
С.Салтанат нь Увс, Баян-Өлгий аймгийн төрийн захиргаа, төрийн хяналт шалгалт болон төрийн аудитын байгууллагад нийт 35 жил ажиллахдаа төрийн албанд шатлан дэвшиж, хариуцлагатай албан тушаалуудыг эрхэлж байсан юм.
Харин Ч.Цэрэнчимэд нь Ховд аймгийн Төрийн хянан шалгах хорооны дарга, Ховд аймгийн аудитын газрын Ерөнхий аудитораар тасралтгүй 18 жил ажилласан, орон нутаг дахь төрийн аудитын байгууллагын шилдэг удирдагчдын төлөөлөл билээ. 
Төрийн хяналт, аудитын салбарын хөгжилд үнэтэй хувь нэмэр оруулж, орон нутаг дахь аудитын байгууллагын төлөвшил, хөгжлийг бэхжүүлэхэд үнэтэй хувь нэмэр оруулсан эрхмүүд ийнхүү Тулгар төрийн 2235 жил, Их Монгол Улс байгуулагдсаны 820 жил, Үндэсний эрх чөлөө, тусгаар тогтнолоо сэргээн мандуулсны 115 жил, Ардын хувьсгалын 105 жил, Ардчилсан хувьсгалын 36 жилийн ойг тохиолдуулан төрийн дээд шагнал болох “Монгол Улсын Гавьяат эдийн засагч” цолоор шагнагдлаа. Уулзалтын үеэр Монгол Улсын Ерөнхий аудитор С.Магнайсүрэн Улсын Их баяр наадмын босгон дээр төрийн дээд шагнал хүртсэн С.Салтанат, Ч.Цэрэнчимэд нарт баяр хүргэж, эрүүл энх, аз жаргал, сайн сайхан бүхнийг хүсэн ерөөв. 
