Монгол Улсын Ерөнхий аудитор С.Магнайсүрэн өнөөдөр (2026.09.04) БНХАУ-ын Нанжины аудитын их сургуулийн магистрын хөтөлбөрт суралцаж төгссөн болон 2026 онд шинээр элсэн суралцахаар шалгарсан Төрийн аудитын байгууллагын албан хаагчдыг хүлээн авч уулзлаа. Монгол Улс, БНХАУ-ын аудитын дээд байгууллага хооронд байгуулсан “Харилцан ойлголцлын санамж бичиг”-ийн хүрээнд Төрийн аудитын байгууллагаас жил бүр хоёр албан хаагчийг Нанжины Аудитын их сургуулийн магистрын түвшинд суралцуулж, мэргэшүүлэх, чадавхыг нь бэхжүүлсээр ирсэн. Энэ хүрээнд Үндэсний аудитын газрын аудитор А.Баясгалан, А.Энхжин нар магистрын хөтөлбөрөө амжилттай дүүргэн эх орондоо ирээд байна.
Харин 2026 оны шинэ элсэлтээр Үндэсний аудитын газрын ахлах шинжээч Б.Мөнхцэцэг, Нийслэл дэх Төрийн аудитын газрын ахлах аудитор Д.Дайриймаа нар шалгарч, удахгүй Нанжины аудитын их сургуулийг зорих юм. Уулзалтын үеэр Монгол Улсын Ерөнхий аудитор С.Магнайсүрэн төгсөгчдөд хандан сурч мэдсэн мэдлэг, туршлагаа Төрийн аудитын байгууллагын үйл ажиллагаанд үр дүнтэй нэвтрүүлж, магистрын судалгааны ажлаар бий болгосон мэдлэг, арга зүйгээ хамт олонтойгоо хуваалцахыг үүрэг болгов. Мөн шинээр суралцахаар шалгарсан Б.Мөнхцэцэг, Д.Дайриймаа нарт байгууллагын үйл ажиллагаанд бодит хувь нэмэр оруулахуйц, нэн шаардлагатай сэдвээр судалгаа шинжилгээ хийж, магистрын зэргээ амжилттай хамгаалахыг захилаа. Мөн Төрийн аудитын байгууллагын удирдлага, хамт олныхоо итгэлийг дааж, хариуцлагатай, амжилттай суралцахыг ерөөв. Уулзалтад Үндэсний аудитын газрын Тамгын дарга, Тэргүүлэх аудитор Б.Бундхорол, Сургалт хөгжил хариуцсан менежер М.Цэцэгмаа нар оролцов.
