Төрийн аудитын байгууллага 2026 оныг “Аудитын нөлөөллийг тооцох, үнэлэх тогтолцоог төлөвшүүлэх жил” болгон зарлаж, аудитын шийдвэрийн хэрэгжилтийг эрчимжүүлэх чиглэлээр үе шаттай арга хэмжээ хэрэгжүүлж байна. Энэ хүрээнд Үндэсний аудитын газраас боловсролын салбарт аудитын шийдвэрийн хэрэгжилтийг эрчимжүүлэх уулзалт-хэлэлцүүлэг зохион байгууллаа. Уулзалт-хэлэлцүүлэгт Боловсролын яамны Төрийн нарийн бичгийн дарга Т.Ням-Очир, Үндэсний аудитын газрын холбогдох албан тушаалтнууд, Боловсролын ерөнхий газар, Боловсролын үнэлгээний төв, аймаг, нийслэл дэх харьяа байгууллагуудын төсөв захирагчид болон төсөв, санхүүгийн асуудал хариуцсан албан тушаалтнууд оролцов.

Аудитын шийдвэрийн хэрэгжилтийн газрын захирал, тэргүүлэх аудитор Ч.Цэвэгдорж Төрийн аудитын байгууллагаас гүйцэтгэсэн аудитаар тогтоосон төлбөрийн акт, албан шаардлага, зөвлөмжийн хэрэгжилтийн өнөөгийн нөхцөл байдал, тэдгээрийн хэрэгжилтийг эрчимжүүлэх хэрэгцээ, шаардлагын талаар мэдээлэл өглөө. Тэрбээр хэрэгжилт хангалтгүй, хугацаа хэтэрсэн аудитын шийдвэрийг хугацаанд нь хэрэгжүүлээгүй тохиолдолд хууль тогтоомжид заасан хариуцлага хүлээлгэх эрх зүйн үр дагавар үүссэнийг онцлон тэмдэглэв. Танхим болон цахим хосолсон хэлбэрээр зохион байгуулсан тус уулзалт-хэлэлцүүлэгт 1000 гаруй албан хаагч хамрагдсан бөгөөд боловсролын салбарт аудитаар нийтлэг илэрч буй алдаа, зөрчлийн шалтгаан, нөхцөл, тэдгээрийг давтан гаргахаас урьдчилан сэргийлэх асуудлыг танилцууллаа. Мөн аудитын шийдвэрийн хэрэгжилтийг Төрийн аудитын байгууллагын цахим системээр дамжуулан тайлагнах, хянах, үнэлэхтэй холбоотой мэдээлэл өгч, санал солилцлоо.

Хэлэлцүүлгийн үеэр боловсролын салбарын холбогдох албан тушаалтнууд аудитын шийдвэрийг хэрэгжүүлэх, хэрэгжилтийг тайлагнах, хянаж үнэлэх явцад тулгамдаж буй асуудал, цаашид анхаарах чиглэлүүдийн талаар санал солилцож, аудитаар илэрсэн алдаа, зөрчлийг давтан гаргахгүй талаар хэлэлцлээ.