НҮБ-ын Цөлжилттэй тэмцэх конвенцын Талуудын 17 дугаар бага хурлын хүрээнд Үндэсний аудитын газар, Үндэсний статистикийн хороо хамтран “Өгөгдөлд суурилсан газрын доройтлын менежмент” арга хэмжээг өнөөдөр (2026.08.21) зохион байгууллаа. Тус арга хэмжээний үеэр Төрийн аудитын байгууллагаас байгаль орчны бодлогын хэрэгжилтэд хийсэн аудитын үр дүн, туршлага, цөлжилттэй тэмцэхэд төрийн аудитын байгууллагын гүйцэтгэх үүрэг, оруулж буй хувь нэмрийн талаар Үндэсний аудитын газрын Бодлого, төлөвлөлт, инновацын газрын захирал  Х.Баярмаа, Чанарын удирдлага, эрсдэлийн газрын захирал  Л.Нүрзэд нар танилцуулж, оролцогчдын дунд хэлэлцүүлэг өрнүүлэв.

Цөлжилт, газрын доройтолтой тэмцэхэд бодлого, хөтөлбөрийн хэрэгжилт, төсвийн зарцуулалт, үр дүн, үр нөлөөг хараат бусаар үнэлэх нь чухал ач холбогдолтой. Энэ хүрээнд Төрийн аудитын байгууллага нь аудитын үр дүнд үндэслэн ил тод байдал, хариуцлагыг дээшлүүлэх, төсвийн хөрөнгийн үр ашигтай зарцуулалтыг хангах, байгаль орчны бодлогын үр нөлөөг нэмэгдүүлэхэд чиглэсэн зөвлөмж, дүгнэлт гаргаж байна. Тодруулбал, байгаль орчин, газрын доройтол, цөлжилт, агаарын бохирдлыг бууруулах чиглэлээр зарцуулсан хөрөнгийн ашиглалт, үр нөлөө, тусгай хамгаалалттай газар нутгийн талаарх хууль тогтоомжийн хэрэгжилт, газар олголт, хог хаягдлын талаар баримталж буй үндэсний хөтөлбөрийн хэрэгжилт, үр нөлөөнд аудит хийсэн.  Мөн улсын төсвийн хөрөнгөөр санхүүжүүлсэн геологийн судалгааны ажлын хэрэгжилт, үр дүн, уул уурхайн тусгай зөвшөөрөл олголт болон хууль тогтоомжийн хэрэгжилт, уул уурхайн нөхөн сэргээлтийн сангийн үйл ажиллагаа, үр дүн, үр нөлөө, ундны ус, ариун цэврийн байгууламжтай холбоотой төсөл, хөтөлбөрүүдийн хэрэгжилт, үр нөлөөнд тусгайлсан  бодлогын аудит гүйцэтгээд байна. 

Тус арга хэмжээ нь газрын доройтол, цөлжилттэй тэмцэх бодлого, шийдвэр гаргалтад чанартай, найдвартай өгөгдлийг ашиглахын ач холбогдлыг онцолж, аудит, статистик болон бусад мэдээллийн эх үүсвэрийг уялдуулах, нотолгоонд суурилсан бодлого хэрэгжүүлэх боломжийг хэлэлцүүлж байгаагаараа ач холбогдолтой юм.